Revista de Lexicografía
A
Revista de Lexicografía é
unha publicación científica de carácter anual consagrada aos estudios
lexicográficos editada polo Departamento de Filoloxía Española e Latina
da Universidade da Coruña.
A revista naceu en 1995 cuns obxectivos modestos: ofrecer aos
investigadores desta materia un lugar de publicación, tendo en conta
que era un dominio desatendido. Pensabamos entón —e seguímolo pensando
agora— que este tipo de revistas especializadas non abundaban no campo
do hispanismo, pero que non por iso debiamos «renunciar a establecer
unha canle xornal de divulgación de todo tipo de traballos
lexicográficos —tanto na súa faceta diacrónica como sincrónica— que
poida mesmo servir de plataforma para outro tipo de actividades».
Así pois, dende o primeiro momento primou ese carácter de publicación
especializada, rexeitando toda veleidade de convertela nunha sorte de
órgano de expresión dun departamento ou dunha facultade, o que a tería
levado a converterse nunha publicación miscelánea; de feito, non suman
o dez por cento dos artigos publicados os textos procedentes non xa da
Universidade coruñesa, senón das tres universidades galegas.
Para garantir a necesaria calidade arbitrouse dende o principio un
rigoroso sistema de avaliación confidencial dos orixinais recibidos,
similar ao das publicacións científicas que queriamos emular, e
buscouse a colaboración dun comité científico de gran calidade, que
reúne boa parte dos mellores especialistas neste campo, non xa do
dominio hispánico, senón de fóra del. Grazas a todo iso puidemos contar
ao longo dos 17 números da revista cun excelente nivel medio; esa
calidade viuse recompensada por unha boa clasificación en repertorios
como
DICE,
RESH y
CIRC,
así como a súa inclusión no restrinxido
ERIH.
Ademais está indexada en
Latindex,
CINDOC,
Dialnet.